Նախագծի մասին

«baku.am» կայքի նպատակն է ներկայացնել և լուսաբանել Ադրբեջանի մայրաքաղաք Բաքվի հայ համայնքի հարուստ անցյալն ու ժառանգությունը:

Կայքը հասցեագրված է գիտական հաստատություններին, արխիվներին և ընդհանրապես բոլոր նրանց, ովքեր հետաքրքրվում են հայկական համայնքների և Բաքու քաղաքի պատմությամբ:

Այն կարևոր է նաև Ադրբեջանի քաղաքացիների և, հատկապես, երիտասարդների համար: Կայքը հիմնավոր տեղեկություն է պարունակում Բաքու քաղաքի պատմության մեջ հայերի թողած հարուստ մշակութային և քաղաքակրթական ավանդի մասին: Երիտասարդ ադրբեջանցիների համար այն կունենա այլընտրանքային տեղեկատվական աղբյուրի նշանակություն:

Ադրբեջանի իշխանությունների կողմից խոսքի ազատության սահմանափակումը  և, ընդհանրապես, մարդու իրավունքների ոտնահարումը, ինչպես նաև պաշտոնական մակարդակի բարձրացված  հակահայ քարոզչությունը արգելում է որևէ հիշատակում Ադրբեջանի  և, մասնավորապես, Բաքվի պատմության մեջ հայերի դերի մասին: Այս առումով կայքն ունի կարևոր առաքելություն՝ բացահայտել Բաքվի պատմության մոռացված կամ արգելված էջերը:

Կայքն ազգայնական կրքեր բորբոքելու նպատակ չի հետապնդում. այն հնարավորություն է տալիս ճանաչել անցյալը և ապահովել երկու հարևան ժողովուրդների խաղաղ համակեցությունն ապագայում:

Կայքը բաց է լրացումների, դիտողությունների և առաջարկությունների համար: